الاثنين، 1 يوليو 2013

في حب مصر

معرفش هكتب ايه النهارده . اول ما فتحت الصفحة عشان اكتب 
كل افكارى راحت منى , فقررت اكتب اللي في قلبي  
قررت اكتب عن مصر   
او بالاصح هى ديما في قلبي , بس عمرى ما اتكلمت عنها 

قررت اتكلم عن مصر 
افتكر وانا صغيرة كنت ببقي مبسوطة اوى وانا واقفة في الطابور وبقول النشيد 
بلادى بلادى بلادى لكى حبي وفؤادى 
كنت مع كل كلمة بقولها بحس بطاقة غريبة 
كنت بحس ان النشيد ده بيمدنى بقوة
كنت مع كل كلمة صوتى بيقوى اكتر واكتر 
كنت بحس في الوقت ده ان لو حد اتكلم عنها ممكن اقتلو 
بس لما كبرت حسيت ان اللي بنسمعو وبنشوفو 
بيقلل الاحساس ده فينا 
حتى لما جيت اقول النشيد 
بقيت استخف بيه واسكت 
مبقتش احس نفس احساس زمان وانا صغيرة 
كبرت شوية كمان 
حبي لمصر بقي ف قلبي عادى , ما انا مصرية , بس بقيت افكر ابعد عنها بس عشان اعيش حياه امنة 
بدون مشاكل 
بعيد عن السرقة وعدم الراحة اللي احنا بنشوفها هنا 
بقيت ابص ان بلاد برة احسن مننا بكتير 
لحد ما جربت الغربة وسافرت , شوفت المعيشة الحلوة اللي بتقدر الانسان شوفت الامن والامان شوفت كل الحاجات اللي بنحلم انها تكون عندنا 
بس مشوفتش نفس الراحة اللي بحسها فبلدى 
مشوفتش الناس اللي بتضحك وانا ماشية 
ضحكتهم بتخلينى اطمن 
دلوقتى بقي عندى 20 سنة 
واقدر اقول ان مفيش اي حاجة ممكن تحل محل مصر جوا قلبي 
مصر مفيش منها اتنين , مفيش بلد ممكن تحسسنى بالراحة اللي بحسها  وانا فبلدى 
ببقي فخورة اوى لما افتكر تاريخ مصر من زمان 
ايام الفراعنة
لما افتكر ان الرسول اتكلم عن جيشها 
وبفرح لما افتكر ان مصر جت في القران 
انا مش انكر انى معترضة علي حاجات في بلدنا لازم تتصلح 
بلدنا هتبقي احسن بلد لما تتصلح 
يبقي غلط اننا نفكر نسيبها 

مع تحياتى :
هــيــامــ ســالــمــ


هناك تعليق واحد:

  1. إحساسك حلو بمصر :)
    فعلا غلط نفكر نسبها غلط أوى لازم أحنا اللي هنصلحها

    بالتوفيق

    ردحذف

رايكم بيساعدنى في تحسين كتابتى ... ارجو التعليق لو سمحتوا ^_^